İdmançılarımızın qələbəsi bizi hər zaman sevindirir

Rayonumuzda bütün sahələrlə yanaşı idman sahəsinə də daim diqqət və qayğı göstərilir, istər beynəlxalq yarışlarda, istərsə də ölkədaxili yarışlarda qalib olan idmançılarla görüşlər keçirilir, onların əldə etdikləri uğurlar yüksək qiymətləndirilir.
Bu gün Qazax rayon İcra Hakimiyyətində müxtəlif yaş qrupları üzrə bu ilin noyabr və dekabr aylarında ölkə və beynəlxalq miqyaslı yarışlarda yüksək nailiyyətlər qazanan rayon idmançıları ilə görüş keçirilib. Görüşdə Samux şəhərində keçirilən ağır atletika üzrə respublika yarışlarının IV mərhələsində, Bakı şəhərində keçirilən milli karate üzrə yeniyetmə və gənclər arasında XVIII respublika birinciliyində, alpaqut döyüş növü üzrə dünya kubokunda, Sumqayıt şəhərində keçirilən karate üzrə Xəzər və Qara dəniz ölkələri çempionatında, sərbəst güləş üzrə böyüklər arasında Azərbaycan çempionatında qalib olan idmançılar və məşqçi müəllimlər, KİV nümayəndələri iştirak edib.
Qazax rayon İcra Hakimiyyətinin başçısı cənab Rəcəb Babaşov idmançıları və məşqçi müəllimləri salamlayıb, qarşıdan gələn 31 dekabr – Dünya Azərbaycanlılarının Həmrəylik Günü və Yeni il münasibətilə səmimi qəlbdən təbrik edib, qazandıqları uğurlara görə ən xoş aruzlarını çatdırıb. Respublika Prezidenti İlham Əliyevin, respublikanın Birinci vitse-prezidenti Mehriban xanım Əliyeva tərəfindən idmana və idmançılarımıza göstərilən diqqət və qayğıdan söz açıb. Bildirib ki, bu gün respublikamızda elə bir bölgə yoxdur ki, orada ən müasir idman qurğuları olmasın. Məhz bunun nəticəsidir ki, ən mötəbər yarışlarda paytaxt Bakı ilə yanaşı, bölgələrdə yaşayan gənclər də iştirak edərək Azərbaycan bayrağını yüksəldir, dövlət himnimizi səsləndirirlər. Siz idmançıların əldə etdikləri nailiyyətlər, ən əsası da üçrəngli Azərbaycan bayrağını daim yüksəklərdə dalğalandırmağınız, milyonlar qarşısında uca zirvələrə yüksəltməyiniz bizləri çox sevindirir. Siz elə bir sahəni təmsil edirsiz ki, orada daim uğur və qələbə var. Siz idmançıların qazandıqları nailiyyətlər, əldə etdiyiniz uğurlar sayəsində Azərbaycan daha da güclənir, güclü idman ölkəsi kimi tanınır.
Məşqçilərdən Nizami Qasımov, Rayət Abdalov və Vüqar Həsənov çıxış edərək iştirak etdikləri yarışlar barədə ətraflı məlumat verib, keçirilən görüşün əhəmiyyətindən söz açıblar. Qeyd ediblər ki, fəaliyyətə başladığınız ilk gündən idman sahəsinə xüsusi diqqət ayırmısınız. Hər zaman müxtəlif yarışlarda qalib olan idmançılarla görüşlər keçirmisiniz. Sizin biz idmançılara verdiyiniz dəyər bizi daha da ruhlandırır, daha böyük nailiyyətlər qazanmağa sövq edir. Biz idmançılar da bizim əməyimizə verilən bu yüksək qiymətə görə bütün idmnasevərlər adından sizə öz dərin minnətdarılığımızı bildirirk.
İdmançılardan Aydın Şəfizadə, Qasım İsmayılov, Nurlan Məmmədzadə, Amil Osmanov, Ayişə Əliyeva, Şərif Qasımov, Coşqun Mustafayev, Fərid Məmmədov, Əbdülmətin İsmayılov, Nurlan Mustafayev, Aytən Əliyeva, Həsənəli Həsənov, Vüqar Yaqubov, Vüsal Yaqubov, Rəvan Məmmədkərimov, Mustafa Mansurov, Göyüş Nurhan Ramil, Emin Namazov və Pənah İlyaslı çıxış edərək iştirak etdikləri yarış barədə öz təəssüratlarını bölüşüb, idmançılara göstərdikləri diqqət və qayğıya görə Respublika Prezidenti İlham Əliyevə bütün idmançılar adından öz dərin minnətdarlıqlarını bildiriblər.
İcra Başçısı sonda idmançıları bir daha səmimi qəlbdən təbrik edib, ölkəmizin çiçəklənməsi naminə daha böyük nailiyyətlər qazanmağı arzu edib.
Sonda Qazax rayon İcra Hakimiyyəti tərəfindən qalib olan idmançılara qiymətli hədiyyələr təqdim olunub.