“Ölkəmizi tanıyaq” tur-aksiyasında iştirak edən rayon məktəbliləri ilə görüş keçirilmişdir

  Qazax rayon İcra Hakimiyyətinin Başçısı cənab Rəcəb Babaşov “Ölkəmizi tanıyaq” maarifləndirici tur-aksiyası çərçivəsində 23-26 mart tarixlərində respublikamızın şimal-qərb bölgəsində ekskursiyada iştirak edən rayon məktəblilərini qəbul edib.
  Rayon İcra Hakimiyyətində keçirilən görüşdə tədbir iştirakçıları ilk öncə 31 mart soyqırımı qurbanlarının xatirəsini bir dəqiqəlik sükutla yad ediblər.
  Qazax rayon İcra Hakimiyyətinin Başçısı cənab Rəcəb Babaşov tədbiri giriş sözü ilə açaraq Ölkə Prezidenti İlham Əliyev cənablarının tapşırığına əsasən hər il mütəmadi olaraq təşkil olunan tur-aksiyanın məqsəd və əhəmiyyətindən söz açıb. Qeyd edib ki, ekskursiyanın təşkil edilməsində məqsəd respublikamızın bölgələrinə səyahət etmək, orada olan tarixi yerlər, qədim və müasir milli memarlıq abidələri ilə yaxından tanış olmaqdan ibarətdir. Yeniyetmə və gənc nəsilin vətənpərvər ruhda tərbiyə olunmasında “Ölkəmizi tanıyaq” tur-aksiyasının böyük rolu olduğunu qeyd edən cənab Rəcəb Babaşov bu cür tur-aksiyaların bundan sonra da təşkil ediləcəyini bildirib.
  Sonra “Ölkəmizi tanıyaq” tur-aksiyasında iştirak edən rayon məktəblilərindən Səma Əfəndiyeva, Cavidan Eyyubov, Emin Rzayev, Günel Bayramova, Arzu İbrahimova, Nərgiz Orucova, Kənan Bayramov və başqaları çıxış edərək Qəbələ, Şəki və Zaqataladan xoş təəssüratlarla qayıtdıqlarını bildiriblər. Qeyd ediblər ki, səfər etdiyimiz rayonlardakı qədim və müasir milli arxitekturalı abidələr, göz oxşayan təbiət mənzərələri bizdə ən xoş hisslər və maraq yaratdı. Anladıq ki, bizim bütün dünyada əvəzi olmayan, göz oxşayan gözəlliyə malik olan ölkəmiz vardır. Onlar bu bölgəyə gələcəkdə bir daha getmək arzusunda olduqlarını söyləyiblər.
  Çıxış edənlər onu da qeyd ediblər ki, bu tur-aksiya bizim üçün ikiqat sevindirici oldu. Biz keçirilən bütün intellektual oyunlarda, yarışlarda, musiqili-əyləncəli proqramlarda birinci olduq. Sertifikat və kuboka layiq görüldük. Qazaxın bölgələr arasında adının birincilər sırasında çəkilməsi bizim üçün əsl bayrama çevrildi. Biz məktəblilər bundan sonra da çalışacağıq ki, hər yerdə rayonumuzun adını bütün sahələrdə yüksəklərə qaldıraq və rayon rəhbərliyinin bizə olan etimadını doğruldaq.
  Valideynlər və şagirdlər öz çıxışlarında bu cür maarifləndirici tədbirlərin və belə tur-aksiyanın təşkilinə görə Respublika Prezidenti İlham Əliyev cənablarına, Qazax rayon İcra Hakimiyyətinin Başçısı cənab Rəcəb Babaşova öz dərin minnətdarlıqlarını bildiriblər.
  Görüşün sonunda rayon İcra Hakimiyyətinin Başçısı cənab Rəcəb Babaşov tur-aksiyada verilən sertifikatları rayon təhsil şöbəsinin müdiri Nizaməddin Babanlıya, şöbənin aparıcı məsləhətçisi Rasim Carçıyevə, RİHB Aparatında aparıcı məsləhətçi-psixoloq Kəmalə Cəfərovaya, uşaq xəstəxanasının həkim-pediatrı Ülkər İskəndərovaya, Aslanbəyli kənd tam orta məktəbin müəllimi Elmar İbrahimova, Çaylı kənd 1 saylı tam orta məktəbin müəllimi Əsmayə Aslanovaya təqdim edib.