Əhalinin su ilə təminatı yaxşılaşdırılır
Ölkə prezidenti İlham Əliyev cənablarının Sərəncamına əsasən Azərbaycanda son illər əhalinin içməli, təsərrüfatların isə suvarma suyu ilə tam təmin edilməsi məqsədilə alternativ su mənbələrinin tapılması istiqamətində nəhəng layihələr həyata keçirilir və məqsədyönlü işlər aparılır. Bunun nəticəsi olaraq 2013-cü ildə respublikamızda Şəmkirçay və Taxtakörpü su anbarlarının tikintisi başa çatmış və istismara verilmişdir. Bu istiqamətdə regionlarda, o cümlədən Qazax rayonunda da bir sıra işlər görülmüş və tədbirlər həyata keçirilmişdir. Rayonda həmin meliorativ tədbirlərə uyğun olaraq yeni suötürücü kanallar çəkilmiş, mövcud kanallar təmir olunaraq beton üzlüyə alınmış və yeni subartezian quyuları qazılmışdır. Təkcə ötən il Qazax rayonunun müxtəlif yaşayış məntəqələrində 17 ədəd yeni subartezian quyusu qazılmışdır. Artıq həmin quyular istismara hazır vəziyyətdədir. Cari ildə isə rayonda daha 9 ədəd yeni subartezian quyusunun yaxın vaxtlarda qazılmasına başlanılacaqdır.
Rayonda bu istiqamətdə işlər ardıcıl davam edir.
