Qazaxda General Əlağa Şıxlınskinin 150 illik yubileyi ilə əlaqədar möhtəşəm tədbir keçirilmişdir
Azərbaycan Respublikasının Prezidenti İlham Əliyev cənabları general, görkəmli hərbi xadim Əlağa Şıxlınskinin 150 illik yubileyinin keçirilməsi haqqında 20 noyabr, 2014- cü il tarixli Sərəncam imzalamışdır.Sərəncamda göstərilir ki, 20 - ci əsrin əvvəllərindən etibarən irimiqyaslı hərbi əməliyyatların iştirakçısı kimi Əlağa Şıxlınskini döyüş meydanlarındakı şücaətləri və artilleriya nəzəriyyəsinə gətirdiyi yenilikləri ilə hərb tarixinə parlaq səhifələr yazmışdır. O, Azərbaycan Demokratik Respublikasının mühüm dövlət təsisatları yaradılarkən milli qoşun hissələrinin təşkilində, müstəqil ordu quruculuğunda müstəsna fəaliyyət göstərmişdir.
Bu Sərəncamın qəbul edilməsi ölkə prezidenti İlham Əliyev cənablarının xalqımızın tarixi keçmişinə, o cümlədən hərb tarixinə göstərdiyi diqqət və qayğının əyani təzahürüdür. Bu Sərəncam gənc nəslin hərbi vətənpərvərlik ruhunda tərbiyyə olunmasında müstəsna əhəmiyyətə malikdir. Ə.Şıxlınskinin 150 illik yubileyinə dair hazırlanmış tədbirlər planına uyğun olaraq Qazax şəhərindəki Olimpiya İdman Kompleksində Azərbaycan Respublikası Müdafiə Nazirliyinin və Qazax rayon İcra Hakimiyyətinin birgə təşkilatçılığı ilə teatrlaşdırılmış kütləvi tamaşa -mərasim keçirilmişdir. Yubileylə bağlı Qazax şəhəri bayramsayağı bəzədilmişdir. Əvvəlcə Ulu öndər Ümumilli lider Heydər Əliyevin əzizi xatirəsi anılmış və abidəsi önünə gül-çiçək dəstələri qoyulmuşdur. Müdafiə nazirinin müavini general-leytenant Kərim Vəliyev, millət vəkilləri, Əhməd Vəliyev, Xanhüseyn Kazımlı, akademik Teymur Bünyadov, kinorejissor, əməkdar incəsənət xadimi Ziya Şıxlinski, Qazax Xeyriyyə Cəmiyyətinin sədri Vidadi Bayramov və başqaları dəvət olunmuş qonaqlar sırasında idi. Sonra tədbir başlamışdır.
" Heyratı" marşının sədaları altında mərkəzə doğru hərəkət edən bayraqdarlar tamaşa üçün meydan yaradırlar . Tədbirin aparıcıları polkovnik, əməkdar incəsənət xadimi Abdulla Qurbani və Məleykə xanım tədbiri açıq elan edərək qonaqları, müharibə veteranlarını, igid əsgər və zabitlərimizi, Qazax elinin vətənpərvər oğullarını və qızlarını , ana və bacıları salamlayırlar, onları Qazaxda keçirilən vətənpərvərlik bayramı münasibəti ilə təbrik edirlər. Bildirirlər ki, Qazax torpağı bu gün yenə də toy- büsat içindədir.
Aparıcılar doğma Azərbaycanımızın tarixinə neçə-neçə elm, mədəniyyət, ədəbiyyat və incəsənət xadimi bəxş etmiş, gündən - günə gözəlləşən, yeniləşən Qazax torpağına, onun insanlarına həsr olunmuş şeirlər söylədilər. Abdulla Qurbani söylədi ki, bu gün ilk hərbi topoqraf, general İbrahim ağa Vəkilovun, ilk hərbi təyyarəçi Fərrux ağa Qayıbovun, divizya komandiri, general İbrahim ağa Usubovun, general Cavad bəy Şıxlınskinin, Osman ağa Gülməmmədovun, Sayad Zeynalovun, ilk azərbaycanlı hərbi şəfqət bacısı Nigar xanım Qayıbovanın, AXC-nin Parlament üzvləri Məmmədrza ağa , Mustafa bəy, Rəhim bəy, Faris bəy Vəkilovların, İtalyanın Milli Qəhrəmanı Tahir İsayevin, Sovet İttifaqı Qəhrəmanı Müseyyib Allahverdiyevin, Milli Qəhəmanlar, Şamoy Çobanovun, Alı Mustafayevin, Aqil Musayevin, Firudin Şamoyevin və Mərifət Nəsibovun da ruhları şaddır. Bu gün Molla Pənah Vaqif, Molla Vəli Vidadi, Səməd Vurğun, Mehdi Hüseyn, Osman Sarıvəlli, İsmayıl Şıxlı, Mirvarid Dilbazi və neçə- neçə Qazaxlı korifey sənətkarlarında ruhları burdadır.
Bundan sonra Ə.Şıxlınskinin həyatı və hərbi fəaliyyəti ilə bağlı görkəmli dövlət və hərbi xadimlərin fikirləri səsləndirildi.
Hərb elmləri doktoru , professor, dövlət mükafatı laureatı, general Yevgeni Barsukov illər öncə yazmışdır: "General Ə.Şıxlınski içərisindən çıxmış olduğu Azərbaycan xalqına bütün varlığı ilə sadiq olub, onu sonsuz dərəcədə sevib. Əliağanın aldığı hərbi tərbiyə, təhsil, orduda xidməti, şanlı döyüş fəaliyyəti və keçdiyi yol elə bir həyat nümunəsidir ki, öz vətəninin şərəf və namusunu, azadlıq və istiqlaliyyətini qorumaq kimi bir vəzifəyə layiq olmaq istəyən hər bir kəs ondan nümunə götürməlidir." Görkəmli yazıçı Aleksandr Stepanov yazır ki,Əilağada general təkəbbüründən əsər -əlamət yox idi .General Əlağa Şıxlınski hünərvərliyi dillərdə dastan olmuşdur. Akademik Heydər Hüseynovun dedikləri: "Əlağa Şıxlınski dünyada şöhrət qazanmış topçuluq elmi sahəsindəki nəşrləri və fəaliyyəti ilə yanaşı, dil və ədəbiyyat məsələləri ilə də məşqul olurdu. O, təvəzökar və səmimi insan , ağıllı və ibrətli bir şəxs idi". General -mayor Akim Abbasovun dediklərindən: " Üç il iki məşhur generalımız Səməd bəyin və Ə.Şıxlınskinin oxuduqları mühazirələrin dinləyicisi olmuşam.Onların hər sözü biz dinləyicilərin qəlbinə çox asanlıqla yol tapırdı. Hərb elmində və hərbi taktikada qazandığım hər şey üçün onlara borcluyam".
General Ə.Şıxlınskinin komandanlıq etdiyi Azərbaycan Əlahiddə Korpusunun şəxsi heyəti döyüş bayrağı altında yubiley mərasiminə dəvət edilir. Onlar "Azəri Türklər" marşını ifa edərək arenaya daxil olurlar.General Ə.Şıxlınski də yubiley mərasiminə təşrif buyurur. Bu zaman yubliyarı qarşılamaq üçün Azərbaycan Əlahiddə Korpusunun varisi, müasir Azərbaycan Respubliksası Silahlı Qüvvələrinin qoşun növlərinin nümayəndələri də mərasimə gəlirlər. Mərasim iştirakçıları quruda, havada və dənizdə Vətənimizin keşiyində ayıq -sayıq dayanan Vətən əsgərlərini qarşılayırlar. "Azərbaycan Əsgəri "marşının sədaları və müxtəlif qoşun növlərinin döyüş bayraqları altında hərbi qulluqçular, topçular, kursantlar səhnəyə daxil olurlar. Bildirilir ki, bu gün ölkəmizdə hərbi vətənpərlik tədbirlərinə daha çox ehtiyacı vardır.Çünki bu gün torpaqlarımızın bir hissəsi düşmən əsarətindədir. Torpaqlarımız düşmən əsarətindən azad olunmalıdır. Bütün xalqımız bu arzuyla yaşayır.Xalqımızın və ordumuzun qələbə əzmi çox yüksəkdir. Bu günki təntənə də bu məqsədi daşıyır.
Bundan sonra Vətən haqqında, hərbi vətənpərvərlik ruhunda fikirlər söylənilmiş və şeirlər səsləndirilmişdir.Silahlı Qüvvələrin Mahnı və Rəqs Ansambılı "Bayram suitası" rəqsini ifa etmişdir.
Qazax mahalında 150 il öncə anadan olmuş görkəmli hərbi xadim, general Əlağa İsmayılağa oğlu Şıxlıski mərasimə gəlir. " Azərbaycan Fanfarası" nın sədaları altında genaral Ə.Şıxlınski tamaşaçılar qarşısından keçərək arenanın mərkəzinə doğru irəliləyir. Bu zaman Əlahiddə Korpusun zabiti "Düzlən, Farağat " komandası verir və generala Əlahiddə Korpusun və onun varisi olan Azərbaycan Silahlı Qüvvələrinin , artilleriya qoşunlarının, Xüsusi Təyinatlı Təhsil müəssisələrinin nümayəndələrinin, ölkəmizin müxtəlif guşələrindən gəlmiş qonaqların və Qazax elinin onun 150 illik yubileyinə həsr olunmuş mərasimə toplaşdıqlarını bildirir.General bütün qonaqları salamlayır, onları bu birlik, Qarabağ uğrunda mübarizəyə hazır olmaları münasibəti ilə təbrik edir. Bundan sonra hərbi orkestirin müşayiəti ilə bütün iştirakçılar Azərbaycan Respubliksının Dövlət Himnini ifa edirlər.
Silahlı Qüvvələrin Mahnı və Rəqs Ansambılı Sevinç Saryevanın ifasında "Xoş gəldin" mahnısının müşayiəti ilə xoreoqrafiq kompozisya təqdim edir.
Qazax rayon İcra Hakimiyyətinin Başçısı cənab Ayaz Əsgərov, Müdafiə Nazirinin müavini general leytenant cənab Kərim Vəliyev çıxış üçün dəvət olunurlar.
Cənab Ayaz Əsgərov bildirmişdir ki, Qazax rayonu bu gün əlamətdar və tarixi günlərindən birini yaşayır. Azərbaycan Respublikasının Prezidenti cənab İlham Əliyevin görkəmli hərb xadimi, tanınmış hərbiçi alim general Əlağa Şıxlınskinin 150 illik yubileyinin keçirilməsi haqqında Sərəncamına əsasən bu gün rayonumuzda yubiley tədbirlərinə start verilir. Bu münasibətlə Qazax rayonunun bütün ictimaiyyəti adından Sizi general Şıxlınskini dünyaya bəxş edən, qədim, eyni zamanda, gündən-günə yeniləşən bu gözəl diyarda ürəkdən salamlayır, dəvətimizi qəbul edərək bu möhtəşəm tədbirdə bizimlə bir yerdə olduğunuz üçün hər birinizə dərin minnətdarlığımı bildirir və xoş gəlmisiniz deyirəm.
Qazax mahalı elm, mədəniyyət, ədəbiyyat, incəsənət xadimləri, eləcə də görkəmli hərb xadimləri ilə həmişə fəxr etmişdir. Biz bu gün onlardan yalnız birinin - general Əlağa Şıxlınskinin işığına toplaşmışıq. Möhtərəm Prezidintimizin 20 noyabr 2014-cü il tarixli Sərəncamında qeyd edilir ki, 20-ci əsrin əvvəllərindən etibarən irimiqyaslı hərbi əməliyyatların iştirakçısı kimi general Əlağa Şıxlınski döyüş meydanlarındakı şücaətləri və artilleriya nəzəriyyəsinə gətirdiyi yenilikləri ilə hərb tarixinə parlaq səhifələr yazmışdır. O, Azərbaycan Xalq Cümhuriyyətinin mühüm dövlət təsisatları yaradılarkən milli qoşun hissələrinin təşkilində, müstəqil ordu quruculuğunda müstəsna fəaliyyət göstərmiş, sonrakı dövrlərdə də hərbi andına sadiq qalaraq ölkənin Silahlı Qüvvələrinin formalaşdırılmasına töhfələr vermişdir.
Xalqımızın Ümummilli lideri Heydər Əliyev bütün fəaliyyəti boyu Azərbaycan tarixinə hörmət və ehtiramla yanaşmış, görkəmli sərkərdələrimizin xatirələrinin əbədiləşdirilməsi, onların yubileylərinin keçirilməsi ilə bağlı zamanında neçə-neçə Sərəncam vermişdir.
Məhz möhtərəm Prezidentimizin bu məlum Sərəncamı da bütün xalqımız kimi, bizim Qazax rayonunun əhalisi tərəfindən də Heydər Əliyev ənənələrinin uğurlu davamı kimi qəbul edildi. Mən təntənəli yubiley mərasimində bir daha bütün qazaxlılar adından möhtərəm Prezidentimiz Cənab İlham Əliyevə general Əlağa Şıxlınskinin 150 illik yubileyinin keçirilməsi haqqında tarixi Sərəncamına görə dərin minnətdarlığımı, hörmət və ehtiramımı bildirirəm.
Qazaxlılar Azərbaycan dövlətinə, Azərbaycan xalqına, ümummilli liderimiz Heydər Əliyevin ideyalarına həmişə sadiq olmuş və bu gün də sadiqdirlər. Ölkə rəhbərliyinin apardığı daxili və xarici siyasəti ürəkdən bəyənir və dəstəkləyirlər. Müstəqil Azərbaycan Respublikasının sürətli dinamik inkişafı, dünyada tanınması, iqtisadi, siyasi, mədəni sahədə qazanılmış uğurlar, ölkəmizin regionda söz sahibi olması və xüsusilə ordu quruculuğundakı müvəffəqiyyətlər bizi də sevindirir və Azərbaycan naminə fəaliyyətimizdə yeni stimul yaradır.
Biz yaxşı bilirik ki, Azərbaycan neçə ildir müharibə şəraitində yaşayır. Hələ də sərhədlərimizdə atəş səsləri eşidilir. Hər gün Ermənistan Silahlı Qüvvələri tərəfindən atəşkəs rejimi bir neçə dəfə pozulur, mövqelərimiz atəşə tutulur, şəhidlər veririk. Lakin buna baxmayaraq igid və mətin Azərbaycan əsgərinin sayəsində düşmən susdurulur, təxribat-diversiya qruplarının qarşısı vaxtında və layiqincə alınır.
Fəxr edirik ki, bizim yenilməz, müdrik, tədbirli Ali Baş Komandanımız, mübarız döyüşçülərimiz və ordumuza həmişə arxa-dayaq olan xalqımız vardır. Ordu ilə xalqın birliyi möhkəmdir, sarsılmazdır. Ötən ilin avqust ayı hamınızın xatirindədir. Azərbaycan ordusu birdaha nəyə qadir olduğunu düşmənə göstərdi. Sübut etdi ki, o hər bir hücumun qarşısını almağa hər an hazır və qadirdir. Həmin günlərdə Ali Baş Komandanın ön səngərə getməsi, təmas xəttində döyüşçülərlə görüşü, fərqlənən bir qrup hərbi qulluqçunu şəxsən mükafatlandırması nəinki Azərbaycan əsgərinin, eləcə də hər bir azərbaycanlının da böyük ruh yüksəkliyinə səbəb olmuşdur.
Bu gün gənclərin orduya hazırlanması, vətənpərvərlik tərbiyəsi ölkə rəhbərliyinin fəaliyyətində prioritetdir. Məhz bu günkü möhtəşəm tədbir də xüsusilə gənclərdə vətənpərvərlik ruhunun yüksəldilməsi, ata-babalarımızın qəhrəmanlıq ənənələri əsasınada onlarda vətənə sədaqət hisslərinin aşılanması məqsədini daşıyır.
Güclü dövlətin güclü ordusu olmalıdır. Azərbaycan güclü dövlətdir və onun güclü ordusu vardır. Biz hər birimiz bundan qürur duyur və Azərbaycan Ordusu ilə fəxr edirik. Möhtərəm Prezidentimizin qeyd etdiyi kimi, Azərbaycan ordusunun peşəkarlığı, döyüş qabiliyyəti artır, Azərbaycan əsgər, gizir və zabitləri vətənə ləyaqətlə xidmət edirlər, öz vətəninə sadiqdirlər. Bizim bütün hərbi hissələrimizdə xüsusilə də ön cəbhədə yerləşən hərbi hissələrdə ruh yüksəkliyi var və Azərbaycan əsgərinin vətənpərvərlik hissləri çox yüksəkdir, möhkəmdir. Biz istənilən vəzifəni icra edə bilərik.
Ordumuzda ən güclü artilleriya qurğuları vardır. Böyük dəqiqliyə və çox böyük dağıdıcı qüvvəyə malik olan raket sistemlıəri, döyüş və nəqliyyat helikoptelləri, döyüş təyyarələri, zirehli texnika, tanklar-bütün bunlar bu gün Azərbaycan ordusunun potensialını təşkil edən amillərdir. Azərbaycan ordusu Dağlıq Qarabağda istənilən obyekti məhv edə bilər. Ötən ilin noyabr ayında ərazimizə təxribat uçuşu edən düşmən helekopterini susduran Azərbaycan əsgərinin sücayəti biz qazaxlıların da hədsiz sevincinə səbəb olmuşdur.
Əziz dostlar, yaxşı bilirsiz ki, ölkəmizin iqtisadi, siyasi potensialı Ermənistandan qat-qat artıqdır, üstündür. Lakin ölkə rəhbərliyi Ermənistan – Azərbaycan, Dağlıq Qarabağ münaqişəsini danışıqlar yolu ilə başa çatdırmaq istəyir. Möhtərəm Prezidentimizin dəfələrlə bəyan etdiyi kimi, münaqişənin həlli yalnız ölkəmizin ərazi bütövlüyü çərçivəsində mümkündür. Dağlıq Qarabağ Azərbaycan ərazisidir, tarixi, əzəli Azərbaycan torpağıdır. Beynəlxalq hüquq normaları bizim mövqeyimizi dəstəkləyir. Bütün dünya Dağlıq Qarabağı Azərbaycan ərazisi kimi tanıyır. Biz heç vaxt Azərbaycan torpağında ikinci qondarma “erməni dövləti”nin yaradılmasına imkan verməyəcəyik, öz ərazi bütövlüyümüzü bərpa edəcəyik: Ya sülh yolu ilə, ya hərbi yolla. Biz hər iki varianta hazırıq.
Çıxışlardan sonra Vətən haqqında şeirlər və Üzeyir Hacıbəyovun Əhməd Cavadın sözlərinə yazdılğı "Çırpınırdı Qara dəniz" mahnısı səsləndirilir, Leyla Vahidqızı" Doğma diyar" mahnısını ifa edir.
Türk generalı Xəlil Paşanın yavəri Səlahəddin bəy xatirələrində yazırdı ki, general Ə.Şıxlınski harada, hansı orduda xidmət etməyindən asılı olmayaraq heç vaxt Türk olduğunu unutmurdu.Azəri türkü olmağından həmişə qürür duyurdu.
"Çırpınırdı Qara dəniz" mahnısının sədaları altında Türkiyə və Azərbaycan bayraqları arenya gətirilir. Əslən generalın nəslindən olan Türkiyəli qonaq çıxış edir. Çıxış uzun sürən alqışlarla qarşılanır. Elə bu zaman arenanın bir tərəfində Molla Pənah Vaqiflə Vidadi görünür. Vaqif özünün məşhur " Durnalar " şeirini oxuyur.Lakin şeirin " qatarlanıb nə diyardan gəlirsiz" misrasının "Qatarlanıb Qarabağdan gəlirsiz?" kimi oxunması sanki insanları Qarabağ uğrunda mübarizəyə səsləyir.
Vaqifin isə "Durnalar" şeirində
Dəyişibdi dövran,bir bax Qazaxa ,
150-də yurda dönüb Əlağa,
Topdağıtmaz ordumuz var ay qağa,
Boyanmazlar qızıl qana durnalar
deməsi sanki şairin ruhunun bu gün öz Vətənində olmasından, generalın yubileyində iştirak etməsindən, Qarabağımızın erməni tapdağından hökmən azad olunacağından xəbər verirdi.
Sonra mərasimdə Azərbaycan xalqını erməni daşnaklarından xilas etmək missiyası ilə Gəncəyə gəlmiş Nuru Paşa ilə Ə.Şıxlınskinin dostluğundan danışılmış və ibrətamiz xatirələr yada salınmışdır.
Nuru Paşa: Ad gününə mən təbrikə gəlmişəm,
Ey qəhrəman silahdaşım Əlağa.
Döyüşlərdə can deyib, can eşitdik,
Qan qardaşım, can qardaşım Əlağa.
Əlağa: Nuru Paşa gözüm üstə yerin var,
Hər ikimiz türkük, türkün oğluyuq.
Sevincimiz kədərimiz bir olub
Biz bir kökə, biz bir soya bağlıyıq
Nuru Paşa: Ay Əlağa,sıralanıb igidlər,
Bu gün- sabah Qarabağa yürüş var.
Xoş gələcək, xoş sabahlar bizimdir
Vətən varsa, demək savaş, vuruş var.
Axırda teatrlaşdırılmış kütləvi mərasimdə Ə.Şıxlınski ilə həyat yoldaşı, ilk hərbi şəfqət bacısı Nigar xanımın tanış olmaları, bir- birini sevmələri, ailə həyatı qurmaları, Nigar xanımın Əlağanın xidmət yerinə - Peterburqa getməsi göstərilir. Əlağanı Nigar xanımın onun 150 illik yubileyinə gəlməsi çox sevindirir və o,"Şükürlər olsun ki,Nigarım qayıdır"deyir.Muğam cütlüyünün ifasında Ə.Şıxlınskinin şeiri təqdim olunur.
Ey sevdiyim,ey dilruba,səbrim,qərarımsan mənim,
Səd mərhaba, Səd mərhaba nə türfə yarımsan mənim.
Teatrlaşdırılmış kütləvi tamaşa anşlaqla başa çatmışdır.
