Silsilə tədbirlər keçirilir

Qazax rayonunda 20 Yanvar faciəsinin 29-cu ildönümü ilə bağlı silsilə tədbirlərə start verilib. Rayon Aqrar İnkişaf Mərkəzində, statistika idarəsində, kommunal müəssisələr kombinatında, təhsil müəssisələrində keçirilən anım mərasimlərində iştirakçılar o müdhiş gecədə törədilən qırğınları azərbaycanlılara qarşı soyqırımı kimi dəyərləndirirlər.
Xatırladılır ki, 1990-cı il yanvarın 19-dan 20-nə keçən gecə 146 nəfər öldürüldü, 744 nəfər yaralandı, 841 nəfər qanunsuz həbs edildi, 200 ev, 80 avtomaşın, o cümlədən təcili tibbi yardım maşınları, dövlət əmlakı və şəxsi əmlak məhv edildi. Həlak olanlar arasında qadınlar, uşaqlar və qocalar, tibb işçiləri də var idi. Lakin qabaqcadan hazırlanmış bu təcavüzkar aksiya Azərbaycan xalqının demokratiya və milli azadlıq uğrunda mübarizəsini qıra bilmədi. Əksinə, Azərbaycan xalqı uzun illərdən bəri arzusunda olduğu müstəqilliyə qovuşaraq suverenlik əldə etdi.
Tədbirdən əvvəl faciə qurbanlarının əziz xatirəsi birdəqiqəlik sükutla yad edilir, sonra faciəni əks etdirən sənədli filmlər nümayiş olunur. O qanlı gecədə törədilən vəhşiliklərin dünya ictimaiyyətinə çatdırılması üçün respublika Prezidentinin apardığı məqsədyönlü işlərə yüksək qiymət verən iştirakçılar tökülən nahaq qanların yerdə qalmayacağına əminlik ifadə edirlər. Diqqətə çatdırılır ki, 20 Yanvar faciəsi mahiyyətinə görə dövlətin öz xalqına qarşı tarixdə misli görünməmiş təcavüzü, keçmiş SSRİ və Azərbaycan SSR konstitusiyalarının kobudcasına pozulması idi. O gecə SSRİ dövləti dinc əhalinin üstünə qoşun yeritməklə BMT Nizamnaməsini, beynəlxalq hüquq normalarını pozdu. Həmin vaxt respublikanın səriştəsiz rəhbərlərindən fərqli olaraq, ümummilli lider Heydər Əliyev həyatını təhlükə qarşısında qoyaraq faciənin ertəsi gün Azərbaycanın Moskvadakı daimi nümayəndəliyinə gələrək bəyanatla çıxış edib xalqımızın başına gətirilən müsibəti bütün dünyaya çatdırdı. Dahi rəhbər ikinci dəfə siyasi hakimiyyətə qayıtdıqdan sonra isə 1994-cü ildə 20 Yanvar faciəsinə ali qanunverici orqan olan Milli Məclisdə hüquqi qiymət verildi.

Sabir ƏLİYEV,
"Azərbaycan”
13.01.2019-cu il