Şair Vəli Xramçaylının 60 illik yubileyi qeyd edilmişdir

Qazaxda Rayon İcra Hakimiyyətinin və Azərbaycan Yazıçılar Birliyinin Qazax zona filialının təşkilatçılığı ilə dövrü mətbuatda “Dərviş” təxəllüsü ilə tanınmış şair, “Ocaq” qəzetinin təsisçisi və baş redaktoru Vəli Xramçaylının 60 illik yubileyi böyük təntənə ilə qeyd edilmişdir. Ədəbiyyat Muzeyinin akt zalında keçirilən yubiley tədbirində şairlər, yazarlar, poeziya sevərlər, respublikanın əksər bölgəsindən olan qonaqlar, məktəblilər, şairin yaxınları, doğmaları, KİV nümayəndələri iştirak etmişdir.
     Ədəbiyyat Muzeyində ədəbi məsləhətçi, şair Mustafa Rasimoğlu tədbiri giriş sözü ilə açaraq Vəli Xramçaylını 60 illik yubileyi münasibətilə təbrik etmiş, onun həyat yaradıcılığından söz açmışdır. Qeyd etmişdir ki, V.Xramçaylının şeirləri Azərbaycan ədəbiyyatında öz dəst-xətti ilə seçilir.
     Azərbaycan Yazıçılar Birliyi Qazax zona filialının sədri, əməkdar incəsənət xadimi, şair Barat Vüsal çıxış edərək yubliyarı anadan olmasının 60 illiyi münasibətilə təbrik etmiş, Azərbaycan ədəbiyyatında, mətbuatında “Dərviş” təxəllüsü ilə tanınan Vəli Xramçaylı yaradıcılığının dərin məna, məzmun kəsb etməsindən,şeirlərinin incəliyindən, həmin şeirlərdə lirikanın üstünlük təşkil etməsindən söz açmışdır.
     Sonra çıxışlar olmuşdur. Bakıdan, Gəncədən, Tovuzdan, Ağstafadan gələn qonaqlar öz ürək sözlərini bildirmişlər.
     Qazax rayon İcra Hakimiyyətinin əməkdaşı Fariz Vəliyev, şairlərdən Mübariz Məsimoğlu, Ələddin İncəli, Əbülfət İslam, Məzahir Alıyev, Abbas Cümənoğlu, Məzahir Yaqub, şairə Səbinə Yusif, şairin yaxın dostu, əməkdar idman xadimi Ramiz Tağıyev, Ağstafada fəaliyyət göstərən Hüseyn Arif adına ədəbi məclisin rəhbəri Saqif Qaratorpaq, Gəncədə çıxan “Rüzgar” qəzetinin baş redaktoru Füzuli Rüzgar, jurnalist Sərhəd Məmmədov, “Ocaq” qəzetinin əməkdaşı Ziba xanım, şairə Tamella Poladlı, şairin qardaşı Sayad müəllim və başqaları çıxış edərək yubliyarı təbirk etmiş, gələcək işlərində uğurlar arzulamışlar.
     Aşıqlardan Camoy Çaylının, Yaqub Şıxlının, gənc aşıq Elvinin ifasında səslənən saz havaları tədbir iştirakçıları tərəfindən alqışlarla qarşılanmışdır.
II Şıxlı Sarıvəlli kənd tam orta məktəbin şagirdləri şairin şeirlərini söyləmiş, bədii kompozisiya nümayiş etdirmişlər.
   Sonda yubliyar çıxış edərək tədbirdə iştirak edənləri salamlamış və iştirak etdiklərinə görə öz dərin minnətdarlığını bildirmişdir. Vaxtilə dövrü mətbuatda çap olunan şeirlərini səsləndirmişdir.
     Daha sonra xatirə şəkli çəkilmişdir.