İcra başçısı İkinci Şıxlı kəndindəki Aqro Parkda mövcud vəziyyətlə maraqlanıb

Son illər ölkəmizdə həyata keçirilən uğurlu islahatlar, məqsədyönlü tədbirlər həm dövlətimizin sosial-iqtisadi cəhətdən inkişaf etdirilməsində, həm də iqtisadiyyatın neft amilindən asılılığının azaldılmasında mühüm əhəmiyyət kəsb edir. Dövlət başçısı İlham Əliyevin kənd təsərrüfatının inkişaf etdirilməsi ilə bağlı imzaladığı çoxsaylı Sərəncam və Fərmanlara əsasən bu gün elə bir sahə yoxdur ki, orada olan inkişaf, tərəqqi gözə çarpmasın. Bütün bunlar isə kənd təsərrüfatının, ümumilikdə ölkə iqtisadiyyatının artan templə inkişaf etməsinin əyani sübutudur.
Ölkə Prezidentinin kənd təsərrüfatının inkişafı ilə bağlı verdiyi tapşırıq və tövsiyələrə uyğun olaraq bu sahəni durmadan inkişaf etdirən rayonlardan biri də Qazax rayonudur. Bunu rayonda yeni-yeni kənd təsərrüfatı obyektlərinin, sənaye müəssisələrinin yaradılmasından da aydın şəkildə görmək olur.
Rayonun İkinci Şıxlı kəndində "İnvestel GROUP” MMC tərəfindən tikilən Aqro Park da bu sahənin inkişaf etdirilməsi istiqamətində həyata keçirilən uğurlu addımlardan biridir. Belə ki, rayonda yaradılmış bu Aqro Park həm kənd təsərrüfatının inkişaf etdirilməsi, həm də yeni iş yerlərinin yaradılması baxımından olduqca böyük əhəmiyyətə malikdir.
Bu gün Qazax Rayon İcra Hakimiyyətinin başçısı Rəcəb Babaşov Prezident Administrasiyasının məsul işçisi Orxan Mürsəlovla birlikdə Aqro Parkdakı mövcud vəziyyətlə maraqlanıb.
İdari işlər üzrə şöbə müdiri Seymur Əhmədov rayon rəhbərliyinə Aqro Park haqqında ətraflı məlumat verərək bildirib ki, torpaq sahələrinin suvarılması məqsədilə uzunluğu 13,5 km olan 520 m-lik metal borular vasitəsilə (yeraltı) 1-ci, 2-ci və 3-cü pillə nasos stansiyaları arasında basqılı boru kəməri çəkilib. O cümlədən, sahədaxili suvarma məqsədilə uzunluğu 18 km olan 315 m-lik polietilen borularla yeraltı suvarma xətləri çəkilib. Bundan əlavə, Aqro Park daxilində sahəsi 1600 kv.m olan quru anbar, tutumu 2670 ton olan çox funksiyalı soyuducu anbar inşa edilib. Sahəsi 463 kv.m olan ikimərtəbəli inzibati idarəetmə ofis binası da tam hazırdır. Sahəsi 608 kv.m olan texnikaların təmiri saxlanılması məqsədilə talvar quraşdırılıb. Həmçinin ərazidə tərəzi, yeməkxana binası, gözətçi otağı, əlavə qurğular və s. inşa edilib istismara verilib. Qeyd edib ki, elektrik təminatı ilə əlaqədar 13,2 km uzunluğunda elektrik hava veriliş xətti çəkilib. 1 ədəd 1000 kVa, 2 ədəd 630 kVa, 1 ədəd 63 kVa transformatorlar quraşdırılıb. 2-ci və 3-cü pilləli nasos stansiyalarına suyun vurulması üçün 1-ci pillə nasos stansiyasında 3 ədəd (1-i ehtiyatda olmaq şərti ilə) 630 kVa nasos (gücləri) quraşdırılıb.
Qeyd edib ki, Aqro Parkın su təminatında da məqsədyönlü işlər görülüb. Belə ki, Xram çayı sahilində 1-ci pillə (irihəcmli) nasos stansiyası və suqəbuledici inşa edilib, o cümlədən, çayın kənarında ərazi boyu sahilbərkitmə işləri görülüb. Sahələrdə isə 2-ci pillə və 3-cü pillə nasos stansiyaları inşa edilərək istismara verilib. Həmçinin torpaqların daimi su ilə suvarılması məqsədilə 2-ci və 3-cü pillə nasos stansiyalarının yanında hər birinin həcmi 4500 kubmetr olmaqla beton örtüklü 2 ədəd su anbarı inşa edilib və ətrafı qorumaya alınıb. Bundan başqa, Aqro Parkın həyətində həyət abadlaşma işləri aparılıb, həmişəyaşıl ağaclar və dekorativ gül kolları əkilib.

S.Əhmədov bu il üzrə aparılan əkin sahəsi haqqında da ətraflı məlumat verib. Bildirib ki, cari ildə 1052,35 hektar sahədə əkin işləri aparılıb. Bunun 300,05 hektarını kartof, 463,0 hektarını buğda, 140,1 hektarını arpa, 5 hektarını noxud, 5 hektarını yazlıq, 20 hektarını payızlıq kök, 74,7 hektarını qarğıdalı, 44.50 hektarını isə soya təşkil edir. Qeyd edib ki, taxıl biçini başa çatıb və məhsul tədarük olunub. Kartof sahələrində iyul ayının əvvəlindən başlayaraq yığıma başlanılıb. Eyni zamanda 5 hektarda əkilmiş kökün çıxarılması da davam edir. 
Aqro Parkla tanış olan rayon rəhbəri bəzi tapşırıq və tövsyələrini verib.
Sonra rayon rəhbərliyi 2018-ci ilin oktyabrında əsaslı təmirdən sonra istifadəyə verilən 35 uşaq yerlik İkinci Şıxlı kənd 2 saylı körpələr evi-uşaq bağçasında yaradılan şəraitlə, körpələrə göstərilən diqqət və qayğı ilə tanış olub.