Qazax Rayonlararası Psixiatriya Xəstəxanasında 31 Dekabr - Dünya Azərbaycanlılarının Həmrəylik Günü və Yeni il bayramı münasibətilə tədbir keçirilib

Azərbaycan xalqının həmrəyliyinin təmin olunmasında misilsiz xidmətləri olan Ümummilli Lider Heydər Əliyevin bizlərə ərməğan etdiyi 31 Dekabr - Dünya Azərbaycanlılarının Həmrəylik Günü və Yeni il bayramı respublikamızın hər yerində olduğu kimi, Qazax rayonunda da böyük təntənə və silsilə tədbirlərlə qeyd olunur.
Dünya azərbaycanlılarının birliyini, soydaşlarımızın həmrəyliyini özündə əks etdirən növbəti belə bayram tədbirlərindən biri bu gün Qazax Rayonlararası Psixiatriya Xəstəxanasında təşkil olunub.
Qazax Rayon İcra Hakimiyyətinin təşkilatçılığı ilə keçirilən bayram tədbirində icra başçısı Rəcəb Babaşov, aparatın məsul şəxsləri, qonaqlardan Ombudsmanın Gəncə Regional Mərkəzinin rəhbəri Səbuhi Abbasov, Mərkəzin baş məsləhətçisi Emil Şəmmədli, Gəncə şəhər Psixiatriya Xəstəxanasının baş həkimi Elmira Mirzəyeva, Gəncə Rayonlararası Ruhi-Əsəb Dispanserinin baş həkimi Tərlan Hüseynova, rayonun hüquq-mühafizə orqanlarının, idarə, müəssisə və təşkilatların rəhbərləri, xəstəxananın işçiləri və müalicə olunan xəstələr, KİV nümayəndələri və musiqiçilər iştirak ediblər.
Qazax Rayon İcra Hakimiyyətinin başçısı Rəcəb Babaşov bayram şənliyində çıxış edərək 31 Dekabr - Dünya Azərbaycanlılarının Həmrəylik Günü və Yeni il bayramı münasibətilə xəstəxanada çalışan işçiləri və müalicə olunan bütün xəstələri təbrik edib, onlara ən xoş arzularını bildirib.
İcra başçısı respublikamızda, eləcə də rayonumuzda bütün sahələrlə yanaşı, səhiyyə sahəsinə də böyük diqqət və qayğı göstərildiyini qeyd edib. Ölkə başçısı İlham Əliyevin, Birinci vitse-prezident Mehriban Əliyevanın səhiyyə sahəsinə olan qayğısının bariz nümunəsi olaraq rayonumuzda inşa olunan 145 çarpayılıq Mərkəzi Xəstəxana Kompleksini, eləcə də əsaslı şəkildə təmir olunan tibb ocaqlarını göstərib. Psixiatriya xəstəxanasında aparılan təmir işlərindən danışan icra başçısı burada xeyli işlərin görüldüyünü qeyd edərək xəstələrin müalicə olunması və qidalanması üçün normal şərait yaradıldığını bildirib. Təmir işlərinin gələcəkdə də davam etdiriləcəyini diqqətə çatdırıb.
İcra başçısı qeyd edib ki, artıq bu xəstəxanada keçirilən bayram tədbirləri ənənə şəklini alıb. Öncə 8 Mart – Beynəlxalq Qadınlar Günü, sonra Novruz bayramı, bu gün isə 31 Dekabr – Dünya Azərbaycanlılarının Həmrəylik Gününü və Yeni ili böyük təntənə ilə qeyd edirik. Bu il də özümə borc bildim ki, ənənəmizə sadiq qalaraq bu gözəl bayramı sizlərlə birlikdə qeyd edim. Rayon rəhbəri bildirib ki, bu cür tədbirlərin keçirilməsində əsas məqsəd odur ki, hər bir vətəndaş bilsin ki, dövlət kimliyindən asılı olmayaraq onun arxa və dayağıdır. Hər zaman öz vətəndaşına diqqət və qayğı göstərir və bu, bundan sonra da belə olacaqdır.
Rayon Mərkəzi Xəstəxanası Publik Hüquqi Şəxs-baş direktor Sevda Məmmədova səhiyyə sahəsinə dövlət səviyyəsində göstərilən diqqət və qayğıdan danışaraq bütün tibb işçiləri adından ölkə başçısı İlham Əliyevə dərin minnətdarlığını bildirib. Rayon rəhbərliyinin diqqət və qayğısı sayəsində rayonumuzda səhiyyənin inkişaf etməsindən danışan baş həkim qeyd edib ki, illərdən bəri diqqətdən kənarda qalmış Psixiatriya xəstəxanasında bu gün normal şərait yaradılıb. Yaradılan yüksək şəraitə və sonsuz diqqət və qayğıya, səmimi münasibətə görə rayon rəhbərliyinə təşəkkürünü ifadə edib.
Qazax Rayonlararası Psixiatriya Xəstəxanasının baş həkimi Ramiz Mansurov çıxış edərək bildirib ki, ilk dəfə 8 Mart – Beynəlxalq Qadınlar bayramı münasibətilə tədbir keçirilən zaman biz bu diqqət və qayğını hiss etdik. Daha sonra Novruz bayramında həmin qayğının uğurla davam etdirildiyinin şahidi olduq. Bu gün isə yeni il bayramının belə yüksək səviyyədə təşkil olunması o deməkdir ki, səhiyyə sahəsinə olan qayğı daim diqqət mərkəzindədir. Baş həkim onlara göstərdiyi diqqət və qayğıya görə başda dövlət başçısı olmaqla rayon rəhbərinə kollektiv adından, xəstəxanada müalicə olunan xəstələr adından öz dərin minnətdarlığını bildirib.
Azərbaycan Yazıçılar Birliyi Qazax zona filialının sədri, Əməkdar incəsənət xadimi, şair Barat Vüsal çıxış edərək əlamətdar gün münasibətilə xəstəxanada müalicə olunan xəstələrə və bütün kollektivə səmimi təbriklərini çatdırıb. Respublikamızın hər yerində olduğu kimi, Qazax rayonunda da səhiyyə sahəsinə xüsusi diqqət və qayğı göstərildiyini qeyd edib. Dövlət başçısının səhiyyə sahəsinə olan diqqət və qayğısının Qazaxda da bu cür əməli işlərdə əksini tapdığını vurğulayıb. Rayonda 145 çarpayılıq yeni Mərkəzi Xəstəxana Kompleksinin tikintisini bu qayğının əyani sübutu kimi qiymətləndirib.
Ombudsmanın Gəncə Regional Mərkəzinin rəhbəri Səbuhi Abbasov çıxış edərək Azərbaycan Respublikasının İnsan Hüquqları üzrə Ombudsmanı Səbinə Əliyevanın adından səmimi salamlarını çatdırıb. Qarşıdan gələn yeni il bayramı münasibətilə ən xoş təbriklərini bildirib. Qeyd edib ki, ölkə başçısı İlham Əliyevin də söylədiyi kimi, sağlam cəmiyyət, sağlam millət hər bir dövlətin inkişafı üçün olduqca vacibdir. Bunu nəzərə alaraq Azərbaycanda səhiyyə sisteminin inkişafı da prioritet sahə kimi dövlət siyasətinin əsas istiqamətlərindən birini təşkil edir. Bu inkişafı çoxsaylı səhiyyə ocaqlarının, tibb mərkəzlərinin istifadəyə verilməsindən, ölkəmizdə olan səhiyyə müəssisələrinin müasir avadanlıqlarla, texnika ilə təmin olunmasından da aydın şəkildə görmək olar. S.Abbasov dövlət başçısının rəhbərliyi altında ölkədə həyata keçirilən sosial-iqtisadi siyasətin prioritetlərindən olan tibbi xidmətlərin keyfiyyətini daha da yaxşılaşdırmaq və müasir tələblərə uyğunlaşdırmaq, əhaliyə göstərilən tibbi xidmətlərin səviyyəsinin artırılmasına nail olmaq və əhalinin sağlamlığının etibarlı qorunmasını təmin etmək məqsədilə icbari tibbi sığortanın ölkəmizdə tətbiqini yüksək qiymətləndirib. 2020-ci ilin aprelindən Qazaxda tətbiq olunacaq icbari tibbi sığortanın vətəndaşların keyfiyyətli tibbi xidmətlə təmin olunmasında böyük töhfə verəcəyini söyləyib.
Sonra 31 Dekabr - Dünya Azərbaycanlılarının Həmrəylik Günü və Yeni il bayarmı münasibətilə əmək funksiyasını peşəkarlıq səviyyəsində yerinə yetirdiyinə görə Xəstəxanada çalışan 12 nəfər işçi – RPX-da şöbə müdirləri Səyalı Ağacanova, Şəfəq Muradova, tibb bacılarından Dilşad Mustafayeva, Şəfəq Məmmədova, Tünzalə Abdullayeva, Rəna Dərziyeva, Elmira Abdullayeva, Nəzirə Vəliyeva, Reyhan Maqsudi, Səbinə Məmmədova, RPX-da aşbaz Solmaz Mahmudova və sanitar Alı Süleymanov Qazax Rayon İcra Hakimiyyəti başçısının Fəxri Fərmanı ilə təltif ediliblər. Təltif olunanlar adından çıxış edən Səyalı Ağacanova onların əməyinə verilən qiymətə, göstərilən diqqət və qayğıya görə rayon rəhbərliyinə minnətdarlığını bildirib.
Bayram şənliyində Yeni il ərəfəsində doğum günü olan şəxslər (müalicə olunan xəstələr) də təbrik edilib. Doğüm günləri münasibətilə tort kəsilib. Daha sonra Xəstəxanada müalicə olunan xəstələrə yeni il hədiyyələri verilib və bayram süfrəsi açılıb.
Bayram şənliyi şəhər 1 və 2 saylı musiqi məktəblərinin ansambıllığının müşaiyəti ilə gənc müğənni Nəsimi Aşbazovun, aşıqlardan Yaşar Gülümcanovun, Şahin Süleymanovun ifasında səslənən şən-şux mahnılardan ibarət konsert proqramı ilə davam etdirilib.