"Yaşıllaşdırma aylığı" Qazaxda uğurla davam edir
Ölkəmizin ekologiya və biomüxtəlifliyinin mühafizəsi naminə səmərəli fəaliyyət göstərən Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyevanın təşəbbüsü ilə bu sahədə böyük uğurlar qazanılıb.
İDEA İctimai Birliyi təsis edildiyi gündən etibarən həyata keçirdiyi genişmiqyaslı "Yaşıllaşdırma aylığı" çərçivəsində milyonlarla ağac əkilib. Bu proses hazırda da uğurla davam etdirilir. İDEA-nın yaşıllaşdırma layihələrinin məqsədi ekoloji tarazlığın bərpası, insanların diqqətini yaşıllıqların salınmasına yönəltmək, eləcədə, ətraf mühitin mühafizəsi işində ictimai nəzarəti gücləndirməkdir.
"Yaşıllaşdırma aylığı"na ilk qoşulanlar sırasında olan Qazax rayon İcra Hakimiyyəti tərəfindən hazırda ağacəkmə kompaniyası uğurla davam etdirilir. Növbəti belə aksiya Bakı-Tbilisi magistral avtomobil yolunun ətrafında keçirilmişdir. Aksiyada Rayon İcra Hakimiyyəti başçısı aparatının əməkdaşları, kənd inzibati ərazi dairəsi üzrə nümayəndəliklər, bələdiyyələr, idarə, müəssisə, təşkilatların əmək kollektivləri və sakinlər iştirak etmişlər. Yolun kənarlarında müvafiq təmizləmə işləri aparılmış, abadlıq işləri görülmüşdür. Yüzlərlə insanın iştirak etdiyi ağacəkmə kompaniyasında 2 mindən çox yeni ağac əkilmişdir. Beləliklə, "Yaşıllaşdırma aylığı"nın əvvəlindən başlayaraq indiyədək rayon ərazisində 10 mindən çox ağac əkilmişdir.
Rayonda artıq ənənə halı almış bu cür tədbirlər ölkəmizdə geniş vüsət almış yaşıllaşdırma kompaniyasına verilən dəstəkdir. Azərbaycan xalqının Ümummilli Lideri Heydər Əliyev ölkəmizə rəhbərliyi dövründə ətraf mühitin mühafizəsinə, ekoloji durumun yaxşılaşdırılmasına xüsusi önəm verirdi.
Hazırda bu məsələ ölkə prezidenti cənab İlham Əliyevin diqqət mərkəzində saxlanılır.
Bu işdə isə Heydər Əliyev Fondunun vitse-prezidenti Leyla Əliyevanın təsisçisi olduğu İDEA İctimai Birliyi xüsusi ilə fəal rol oynayır.
Getdikcə geniş vüsət alan ağacəkmə kompaniyası nəticəsində rayonun ərazisi abadlaşır, yaşıllıqlarla zənginləşir və insanlar arasında təbiətə qayğı hissi təbliğ edilir.
Rayonda bu cür ağacəkmə kompaniyalarının davamlı olması nəzərdə tutulmuşdur.
