Milli Ordumuzun uğurlarını Qazax gəncləri sevinclə qarşılayır

Aprelin 1-dən 2-nə keçən gecədən başlayaraq Ermənistanın Azərbaycana qarşı növbəti silahlı təxribatı nəticəsində həlak olmuş hərbiçilərimizin və mülki şəxslərin ruhunu yad etmək və ordumuza dəstək məqsədi ilə Azərbaycan Dövlət Pedaqoji Universiteti Qazax filialının tələbə-müəllim heyəti və pedaqoji kollektivinin iştirakı ilə tədbir keçirilmişdir. Tədbir ilk öncə dahi bəstəkarımız Üzeyir Hacıbəyovun azadlıq himnini doğuran “Koroğlu” uverturasının səslənməsi ilə başlamışdır.
Sonra torpaqlarımızın azadlığı uğrunda canlarından keçərək şəhidlik zirvəsinə yüksələn şəhidlərimizin xatirəsi bir dəqiqəlik sükutla yad edilmişdir.
ADPU Qazax filialının direktoru, dossent Afaq Qasımova tədbirdə çıxış edərək bildirmişdir ki, Ermənistan hərbi qüvvələri artıq bir neçə gündür ki, Azərbaycan kəndlərini, yaşayış məntəqələrini böyük miqyaslı silahlar – top və pulemyotlardan atəşə tutur, hərbi mövqelərimizə ardıcıl zərbələr endirir. Azərbaycan Ordusu vətəndaşların təhlükəsizliyini və öz mövqelərini qorumaq üçün Ermənistan silahlı qüvvələrinə lazımi cavabı verib. Azərbaycan münaqişənin həlli ilə bağlı məsələnin reallaşdırılması üçün üzərinə düşənləri yerinə yetirsə də, növbəti təxribat törədilib və qarşısı qətiyyətlə alınıb. Prezident İlham Əliyevin dediyi kimi, “bizə qarşı yenə təxribat törədilərsə onlar yenə də öz cəzalarını alacaqlar. Biz Ermənistan torpağını işğal etməmişik. Biz öz torpağımızda vuruşuruq. Əgər erməni əsgəri ölmək istəmirsə, Azərbaycan torpağından rədd olsun. Mən bunu dəfələrlə demişəm, bir daha demək istəyirəm”. A.Qasımova ordumuzun, əsgərlərimizin gücündən söz açmış,dövlətimizin, xalqımızın onlara böyük etimad göstərməsini vurğulamışdır.
ADPU Qazax filialının direktor müavini, dossent Məmməd Yusifov, riyaziyyat-informatika kafedrasının müəllimi Hüseyn Xəlilov, azərbaycan dili və ədəbiyyat kafedrasının müdiri İradə Arıxova, kafedranın baş müəllimi Heyran Vəkilova, pedaqoji fənlər kafedrasının müəllimi Hamlet İlyasov çıxış edərək şəhidliyin ən uca zirvə olduğunu, torpaqlarımız uğrunda həlak olan şəhidlərimizin, onların əziz xatirəsinin hər zaman qəlbimizdə yaşayacağını bildirmişlər.
Sonra tələbələrdən riyaziyyat-informatika fakültəsinin III kurs tələbəsi Nicat Məmmədov, IV kurs tələbəsi Orxan Abışov, azərbaycan dili və ədəbiyyat fakültəsinin II kurs tələbəsi Yaqub Vəliyev çıxış edərək Prezident, Ali Baş Komandan İlham Əliyevin ətrafında sıx birləşdiklərini, vətənimizi yad tapdağından azad etməyə hər an hazır olduqlarını söyləmişlər. Əsgərlərimizin böyük bir məsuliyyət üzərinə götürdüyünü bildirən tələbələr Ali Baş Komandan əmr verərsə, hər birinin ön cəbhəyə gedib doğma torpaqlarımızı azad edənədək vuruşmaq əzmində olduqlarını ifadə etmişlər.
Daha sonra tələbələrdən bir qrupu vətənpərvərliyə, azadlığa, şəhidlərmizə həsr olunmuş şeirlər söyləmişlər.
Tədbir Azərbaycan Respublikasının Dövlət Himninin səsləndirilməsi və “Qarabağ bizimdir, bizim olacaq”, “Qarabağa azadlıq” şüarları ilə başa çatmışdır.