İcra başçısı abadlıq işləri aparılan ərazilərdə olub

Ölkə Prezidenti cənab İlham Əliyevin rəhbərliyi altında respublikamızın hər yerində olduğu kimi, Qazaxda da genişmiqyaslı quruculuq işləri aparılır. Ölkə rəhbərinin birbaşa göstərişi, diqqət və qayğısı sayəsində Qazaxda şəhərin içməli su və kanalizasiya sistemi də yenidən qurulur. Təqdirəlayiq hal isə odur ki, "Azərsu” Açıq Səhmdar Cəmiyyəti tərəfindən şəhərdə su və kanalizasiya xətlərinin çəkilişi ilə yanaşı, işlərin başa çatdırıldığı küçələrdə abadlıq işləri görülür. Molla Pənah Vaqif, Səməd Vurğun, Azadlıq, Zeynalabdin Tağıyev, Murtuz Carçıyev, Əminə Dilbazi, Molla Vəli Vidadi, Hüseyn Arif, Məmməd Əmin Rəsulzadə  küçələrinə yeni asfaltın vurulması, Nəriman Nərimanov yaşayış massivində yerləşən 1,2,3,49 saylı, Heydər Əliyev prospektində yerləşən 61A,63,65 saylı, Azadlıq küçəsində yerləşən 92 saylı, Şəhidlər Xiyabanı küçəsində yerləşən 12,14,25,27 saylı çoxmənzilli yaşayış binalarının həyətində abadlıq işləri aparılaraq"Abad məhəllə” kimi sakinlərə təqdim olunması bu dediklərimizin əyani sübutudur.
Qazaxda görülən işlər demək olar ki, gündən-günə daha geniş miqyas alır. Rayonda ən böyük küçələrdən olan Əliağa Şıxlinski küçəsində su-kanalizasiya sisteminin çəkilişi sürətlə davam etdirilir ki, işlər yekunlaşan kimi burada da yeni asfalt vurulacaq. Hazırda şəhərin Heydər Əliyev prospektində, Azadlıq və Zeynalabdin Tağıyev küçələrində səkilərə yeni tamet döşənir, beton vurulur.
Bu gün Qazax Rayon İcra Hakimiyyətinin başçısı Rəcəb Babaşov abadlıq işləri aparılan ərazilərdə olub, görülən bütün işlərin keyfiyyətinə üstünlük verilməsini bildirib və aidiyyəti üzrə müvafiq tapşırıqlarını verib. 
Rayonda görülən işlər sakinlər tərəfindən də razılıqla qarşılanır və bu işlərə görə ölkə başçısı İlham Əliyevə, rayon rəhbərliyinə minnətdarlıqlarını bildirirlər.