Qazaxda yeni uşaq bağçası tikilir
“Regionların Sosial-İqtisadi İnkişafına dair Dövlət Proqramı”na uyğun olaraq rayonumuzda tikinti-quruculuq işləri getdikcə daha geniş vüsət alır. Görülən bu genişmiqyaslı işlərin nəticəsidir ki, Qazax gündən-günə öz görkəmini dəyişir və daha da gözəlləşir.
Ölkəmizdə dövlətimiz tərəfindən körpələrə daim diqqət və qayğı göstərilir. Rayonumuzda da bu sahəyə xüsusi önəm verilir, körpələrin daha yaxşı şəraitdə tərbiyə və təhsil almaları təmin edilir. Bu məqsədlə rayon rəhbərliyinin qayğısı sayəsində 100 yerlik daha bir yeni bağça binasının tikintisinə başlanılmışdır.
Yeni inşa olunan 1 saylı körpələr evi-uşaq bağçası 2 korpusdan ibarət olacaqdır. Əsas binadan əlavə nasosxana və qazanxananın inşası da nəzərdə tutulub. Yeni bağçada hər birinin həcmi 100 kub metr olan 2 ədəd su anbarı tikiləcəkdir. İçməli suya olan təlabatı ödəmək və yanğından mühafizə məqsədilə tikilən bu anbarlar müasir standartlara cavab verən səviyyədə inşa olunacaqdır.
Bundan başqa yeni bağçada oyun meydançası da olacaqdır ki, bu da uşaqların asudə vaxtlarının səmərəli keçməsi üçün olduqca vacibdir. Əsas korpus 3 mərtəbədən və zirzəmidən ibarət olacaqdır.
Yaxın aylarda müasir standartlara cavab verən yeni bağça binası körpələrin istifadəsinə veriləcəkdir.
