8 Mart – Beynəlxalq Qadınlar Günü münasibətilə tədbir keçirilib
Qazax rayon İcra Hakimiyyətində 8 Mart – Beynəlxalq Qadınlar Günü münasibətilə tədbir keçirilib. Rayon İcra Hakimiyyətinin Başçısı cənab Rəcəb Babaşov tədbiri giriş sözü ilə açaraq qadınları bayram münasibətilə təbrik edib. Bildirib ki, ümummilli lider Heydər Əliyevin qadın və cəmiyyət siyasətində qadına diqqət və qayğı mühüm bir istiqamət kimi göstərilmişdir. Həmin siyasət bu gün Ölkə Prezidenti İlham Əliyev tərəfindən uğurla davam etdirilir.
Milli-mənəvi dəyərlərimizin, adət və ənənələrimizin keşiyində şərəflə dayanan qadınlarımız həmişə Azərbaycanın müstəqilliyi, güclü və qüdrətli dövlətə çevrilməsi yolunda böyük işlər görmüşlər. Dövlət quruculuğunun bütün sahələrində səylə çalışan və uğurlar qazanan qadınlarımız ölkəmizdə ictimai-siyasi sabitliyin qorunmasında, müstəqil dövlətçiliyimizin daha da möhkəmləndirilməsində, elmin, mədəniyyətin, ədəbiyyatın inkişaf etdirilməsində böyük xidmətlər göstərmişlər.
Tədbirdə xüsusi vurğulanıb ki, Azərbaycan xalqının milli-mədəni irsinin öyrənilməsində, xalqımızın dərin köklərə malik musiqisinin, ədəbiyyatının və mədəniyyətinin təbliğində Heydər Əliyev Fondunun Prezidenti, Azərbaycan Respublikasının birinci vitse-prezidenti Mehriban Əliyevanın fəaliyyətini qadınlarımız örnək kimi qəbul edirlər.
Tədbirdə çıxış edənlər qeyd ediblər ki, biz bu gün fəxrlə bildiririk ki, Qazax qadınları da həmişə öz üzərlərinə düşən vəzifələri ləyaqətlə yerinə yetiriblər. Onlar bu gün ölkəmizdə həyata keçirilən sosial-iqtisadi siyasətin fəal müdafiəçiləri və iştirakçılarıdırlar. Rayonumuzun qadınları tarixin taleyüklü məqamlarında həmişə öz sözlərini deyiblər və milli maraqlara söykənən mövqelərini nümayiş etdiriblər.
Rayon İcra Hakimiyyəti Başçısının müavini Gulaya Həsənova çıxış edərək onlara göstərdiyi diqqət və qayğıya görə bütün qadınlar adından İcra Başçısı cənab Rəcəb Babaşova dərin minnətdarlığını bildirib.
Tədbirdə qadınlara gül dəstələri və qiymətli hədiyyələr verilib.
Sonda rayon İcra Hakimiyyətinin Başçısı cənab Rəcəb Babaşov bir daha bütün qadınları təbrik edərək onlara möhkəm cansağlığı, ailə xoşbəxtliyi və işlərində yeni-yeni uğurlar arzulayıb.
