Daş Salahlı kənd 2 və 3 saylı körpələr evi-uşaq bağçalarının açılışı olub

Rayonumuzda ötən 1 il yarım müddət ərzində bütün sahələrlə yanaşı, məktəbəqədər yaşlı körpələrin sağlam böyümələrinə, məktəbəqədər tərbiyə müəssisələrinin maddi-texniki bazasının möhkəmləndirilməsinə də böyük diqqət yetirilir. Bu məqsədlə onların hərtərəfli və düzgün böyüməsi, tərbiyə olunması üçün yeni uşaq bağçaları tikilir, müasir inventar və avadanlıqlarla təmin olunur. 
Qeyd edək ki, rayonun Daş Salahlı kəndindəki 2 və 3 saylı uşaq bağçaları Qazax rayon İcra Hakimiyyətinin başçısı cənab Rəcəb Babaşovun təşəbbüsü ilə Akkord sement zavodu tərəfindən əsaslı təmir edilərək yenidən qurulub. Hər iki bağçada yeni mətbəx, yemək və yataq otaqları, musiqi, idman və əyləncə zalları inşa edilib, mərkəzləşdirilmiş istilik sistemi yaradılıb. Yüksək səviyyədə, əsaslı şəkildə təmir edilən bağça binaları müasir tələblərə tam cavab verir.
Kosalar, Xanlıqlar, sərhəddə yerləşən Cəfərli kənd körpələr evi-uşaq  bağçalarından sonra  Daş Salahlı kəndində əsaslı şəkildə təmir olunmuş və yenidənqurulmuş 2 və 3 saylı körpələr evi-uşaq bağçalarının açılışı olub.
Açılışda RİHB Aparatının məsul işçiləri, idarə müəssisə və təşkilat rəhbərləri, bağça müdirləri, kənd sakinləri, valideynlər, KİV nümayəndələri iştirak edib.
Qazax rayon İcra Hakimiyyətinin başçısı cənab Rəcəb Babaşov Daş Salahlı kəndinə gələrək bağçaların açılış mərasimində iştirak edib.
Cənab Rəcəb Babaşov mərasimi giriş sözü ilə açaraq körpələri, onların valideynlərini və müəllimləri səmimi qəlbdən təbrik edib, ən xoş arzularını çatdırıb. Qeyd edib ki, Azərbaycanda uşaqlara diqqət və onların sosial müdafiəsinin gücləndirilməsi ilə bağlı həyata keçirilən siyasətin əsasını ulu öndər Heydər Əliyev qoyub. Həmin siyasəti dövlətimizin başçısı İlham Əliyev uğurla davam etdirərək bu istiqamətdə çox mühüm layihələrin həyata keçirilməsi ilə bağlı müvafiq sərəncamlar verib.
İcra başçısı bildirib ki, gələcəyimiz olan uşaqların sağlam və xoşbəxt böyüməsi üçün Azərbaycan Respublikasının birinci vitse-prezidenti Mehriban xanım Əliyeva tərəfindən də hərtərəfli və məqsədyönlü işlər görülür.
Daş Salahlı kəndində açılışına toplaşdığımız  55 yerlik 2 və 3 saylı körpələr evi-uşaq bağçaları da göstərilən həmin diqqət və qayğının nəticəsidir. Hazırda rayonumuzda digər sahələrlə yanaşı, yeni uşaq bağçalarının əsaslı təmiri və tikintisi daha da genişləndirilib. Bu il ərzində əsaslı şəkildə təmir edilən Kosalar kəndindəki 2 və 3 saylı körpələr evi-uşaq bağçaları, Xanlıqlar kənd körpələr evi-uşaq bağçası, Cəfərli kənd uşaq bağçası bu istiqamətdə həyata keçirilən işlərin ən bariz nümunəsidir. Qazax şəhərində tikintisi başa çatdırılan və açılışa tam hazır olan 100 yerlik 1 saylı körpələr evi-uşaq bağçasının yeni binası da açılışa tam hazırdır.
Daş Salahlı kənd 2 saylı körpələr evi-uşaq bağçasının müdiri Aybəniz Kərimova, tərbiyəçi Çiçək Vəliyeva, 3 saylı körpələr evi-uşaq bağçasının müdiri Ramella Abdürrəhmanova, kənd ağsaqqalı Fərhad Qocamanov, valideyn Flora Həsənova çıxış edərək böyüməkdə olan balaların yüksək şəraitdə təlim və tərbiyə almaları üçün göstərilən diqqət və qayğıdan böyük fərəh hissi ilə danışıblar. Çıxış edənlər uşaqlar üçün yaradılan bu gözəl şəraitə görə Respublika Prezidenti İlham Əliyev cənablarına müəllim və valideynlər, bütün kənd sakinləri adından öz dərin minnətdarlıqlarını bildiriblər. Rayon İcra Hakimiyyətinin başçısı cənab Rəcəb Babaşova və Akkord sement zavodunun direktoru Elçin Qasımova ən xoş arzularını çatdırıblar. Yeni il ərəfəsində belə gözəl bağça binalarının tikilib istifadəyə verilməsi  uşaqlar üçün ən böyük hədiyyə olduğunu söyləyiblər.
Uşaq bağçası binalarının rəmzi açılışını bildirən lent kəsildikdən sonra tədbir iştirakçıları əsaslı şəkildə təmir olunan bağçalarla tanış olublar. Əvvəlcə, bağçaların dünənini və bu gününü özündə əks etdirən fotostendə baxıblar. Bağçalarla tanış olduqdan sonra Rəcəb Babaşov hər iki bağçada çalışan kollektivlə görüşüb tapşırıq və tövsiyələrini verib. Tədbirdə Akkord sement zavodu tərəfindən körpələrə hədiyyələr təqdim olunub. 

Açılış mərasimindən sonra cənab Rəcəb Babaşov Akkord sement zavodunun direktoru Elçin Qasımovla birlikdə kənddəki 1 saylı  uşaq bağçasına gəlib və vəziyyətlə yerində tanış olub. Bildirilib ki, bu bağça binası da yararsız halda olduğuna görə yaxın vaxtlarda əsaslı şəkildə təmir olunacaqdır.