“Azərişıq” ASC-nin sədri Qazaxda vətəndaşlarla görüşüb
“Azərişıq” ASC regionlarda əsaslı təmir-bərpa, yenidənqurma, eləcə də maarifləndirmə işlərini davam etdirir. Bununla yanaşı, Prezident İlham Əliyevin vətəndaşların şəhər və rayonlarda qəbulunun keçirilməsinə dair tapşırığına uyğun olaraq regionlarda yerli sakinlərlə görüşlər də keçirilir.
Silsilə tədbirlərin davamı olaraq “Azərişıq” ASC-nin sədri Vüqar Əhmədov aprelin 29-da Qazax və Ağstafa rayonlarından olan vətəndaşları qəbul edib.
Qəbuldan əvvəl Qazax Rayon İcra Hakimiyyətinin başçısı Rəcəb Babaşov və “Azərişıq” ASC-nin sədri Vüqar Əhmədov Ümummilli Lider Heydər Əliyevin Qazax rayonundakı abidəsini ziyarət ediblər. Abidə önünə gül dəstələri qoyulub, əziz xatirəsinə dərin ehtiram ifadə edilib. Dahi şəxsiyyətin adını daşıyan Mərkəz ziyarət olunub.
Yeni Azərbaycan Partiyası (YAP) Qazax rayon təşkilatının inzibati binasında baş tutan qəbul zamanı qurumun fəaliyyət istiqamətlərinə uyğun olan müraciətlər cavablandırılıb, həmçinin qaldırılan bəzi məsələlərin yerindəcə həlli üçün tədbirlər görülüb, həlli araşdırma tələb edən məsələlərlə bağlı yazılı müraciət qeydə alınıb və aidiyyəti şöbələrin icraatına göndərilib.
Hər iki rayonun müxtəlif kəndlərindən gələn sakinlər regionlarda həyata keçirilən yenidənqurma işlərinə, həmçinin bölgələrdə qəbulla bağlı göstərdiyi diqqət və qayğıya görə Azərbaycan Prezidentinə minnətdarlıqlarını bildiriblər.
Qeyd edək ki, “Azərişıq” ASC tərəfindən həyata keçirilən silsilə tədbirlər vətəndaşların dayanıqlı və fasiləsiz elektrik enerjisi ilə təmin olunması, həmçinin elektrik enerjisi itkilərinin minimuma endirilməsinə hədəflənib.
