Ekologiya və Təbii Sərvətlər naziri Qazaxda vətəndaşları qəbul edib
Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə əsasən, 15 iyul 2022-ci il tarixində Ekologiya və Təbii Sərvətlər naziri Muxtar Babayev Qazax şəhərində yerləşən Gənclər Mərkəzində vətəndaşları qəbul edib.
Qəbuldan əvvəl nazir və Qazax Rayon İcra Hakimiyyətinin başçısı Rəcəb Babaşov Ulu Öndər Heydər Əliyevin abidəsini ziyarət edərək abidə önünə gül dəstələri qoyub, dahi şəxsiyyətin əziz xatirəsinə dərin ehtiramlarını bildiriblər.
Sonra Ümummilli Liderin adını daşıyan mərkəzdə həyat və fəaliyyətindən bəhs edən stendlərə baxılıb, ölməz şəxsiyyət ehtiramla anılıb.
Görüş zamanı ətraf mühitin mühafizəsi, meşələrin qorunması, biomüxtəliflik, mineral xammal, hidrometeorologiya, işlə təmin olunma və digər məsələlərlə bağlı vətəndaşların müraciətləri dinlənilib. Qaldırılan məsələlərin bir qismi yerindəcə həllini tapıb, digərlərinin isə qısa müddətdə araşdırılaraq zəruri tədbirlərin görülməsi barədə nazirliyin məsul işçilərinə müvafiq tapşırıqlar verilib.
Vətəndaşlar bölgə sakinlərinin qəbulu və müraciətlərinə baxılması üçün rahat və əlverişli şərait yaradılmasından razılıqlarını bildirərək, onlara göstərilən diqqət və qayğıya görə Prezident İlham Əliyevə minnətdarlıqlarını ifadə ediblər.
