İcra başçısı Dəmirçilər və Bala Çaylı kəndlərində vətəndaşların su təminatının yaxşılaşdırılması istiqamətində görüləcək işləri aidiyyəti şəxslərlə birlikdə yerində müzakirə edib
Bu gün hər kəsə yaxşı məlumdur ki, cənab Prezident İlham Əliyevin rəhbərliyi altında ölkəmizdə vətəndaşlara göstərilən diqqət və qayğı dövlətimizin yürütdüyü siyasətin prioritet istiqamətlərindən birini təşkil edir. Son illər ölkə rəhbərinin vətəndaşlarla bağlı apardığı uğurlu dövlət siyasətinin və görülən işlərin təməlində vətəndaş məmnunluğu dayanır. Dövlət başçısının rəhbərliyi ilə həyata keçirilən işlər, atılan addımlar, icra olunan layihələr bir daha onu sübut edir ki, dövlət hər zaman öz vətəndaşının yanında olmağı əsas götürür. Ölkə başçısının verdiyi bütün tapşırıq və tövsiyələr vətəndaşların sosial rifah halının yaxşılaşdırılmasına, qaldırılan məsələlərin, edilən müraciətlərin müsbət həllini tapmasına xidmət edir.
Ölkə Prezidentinin icra hakimiyyəti başçılarını, eləcə də mərkəzi icra hakimiyyəti orqanlarının rəhbərlərini qəbul edərkən öz çıxışlarında dəfələrlə dövlət məmurları haqqında söylədiyi fikirlər, dövlət məmurlarına daim xalqın içində olmaları, bütün kəndləri gəzmələri, sakinlərlə görüşmələri, vətəndaşların qayğılarını, problemlərini onların öz dilindən öyrənmələri, düzgün təhlil aparmaları barədə aidiyyəti üzrə verdiyi tapşırıq və tövsiyələr bunun əyani sübutudur.
Sentyabrın 6-da Qazax Rayon İcra Hakimiyyətinin başçısı Rəcəb Babaşovun rayonun Dəmirçilər və Bala Çaylı kəndlərində yaşayan sakinlərin içməli su təminatının yaxşılaşdırılması istiqamətində görüləcək işləri aidiyyəti şəxslərin və kənd sakinlərinin iştirakı ilə yerində müzakirə etməsi vətəndaşlara olan qayğının daha bir bariz nümunəsidir. Adı çəkilən kəndlərdə, eləcə də Çaylı, Ürkməzli, Daş Salahlı kəndlərində su probleminin köklü şəkildə öz müsbət həllini tapması üçün görüləcək işlərin müzakirə edilməsi və bununla bağlı aidiyyəti şəxslərə tapşırıq verilməsi bir daha onu sübut edir ki, rayon rəhbərliyi vətəndaşların qaldırdığı hər bir məsələyə həssaslıqla yanaşır.
Qeyd etdiyimiz kəndlərdə su təminatının yaxşılaşdırılması istiqamətində görüləcək işləri kənd sakinləri də razılıqla qarşılayırlar. Sakinlər onlara göstərilən diqqətə, qayğıya görə ölkə Prezidenti İlham Əliyevə minnətdarlıqlarını bildirirlər. Rayonda bütün sahələrdə vətəndaş amilinin əsas götürülməsinə, qaldırdıqları məsələlərin həlli istiqamətində görülmüş işlərə görə rayon rəhbərliyinə razılıqlarını ifadə edirlər.
