İcra başçısı şəhid Sayad Allahyarovun anasının üç mərasimində iştirak edib və ailəsinə başsağlığı verib

Vətən, torpaq, böyük amallar uğrunda canından keçərək verilmiş ömür payını gələcək nəsillərin xoşbəxtliyinə bağışlayan igid oğullarımız Şəhidlik zirvəsinə ucaldılar. Gələcək nəsillərin vətənpərvər ruhda tərbiyə olunması, şəhidlərini, Milli Qəhrəmanlarını tanıyaraq böyüməsi isə biz vətəndaşların çiyinlərinə böyük yük qoyur. Bu gün Vətənini sevən hər bir azərbaycanlı şəhidlərinə, onların ailə üzvlərinə, doğmalarına, yaxınlarına hörmətlə yanaşmalı, şəhidlərimizi gələcək nəsillərə tanıtmalıdır. Vətənin müdafiəsi uğrunda canından keçən qəhrəmanlarımızı, igid oğullarımızı hər bir Azərbaycan vətəndaşı tanımalı, onların keçdiyi şərəfli döyüş yolunu bilməlidir. Vətən yolunda Şəhidlik zirvəsinə ucalan igid, mərd oğulları yad etmək, onların xatirələrini əziz tutmaq, adlarını əbədiləşdirmək isə bizim hər birimizin ən müqəddəs vəzifəsi və borcu olmalıdır. Vətənpərvərlik hissi, döyüş ruhu qazaxlı gənclərdə hər zaman yüksək səviyyədə olub. İstər Birinci Qarabağ müharibəsi, istər 44 günlük Vətən müharibəsi, istərsə də digər döyüşlərdə Qazaxın igid, mərd oğulları döyüş meydanında göstərdikləri qəhrəmanlıqlarla adlarını tarixə yazdırıblar. Ən əsası da göstərdikləri şücaətlə bir daha sübut ediblər ki, vətənpərvərlik hissi, döyüş ruhu qazaxlı gənclərdə hər zaman olub və bu, bundan sonra da belə olacaq. 

Bu gün Ermənistanla 168 km sərhədi olan Qazax rayonu Vətən torpaqlarının ərazi bütövlüyü uğrunda 348 nəfər şəhid verib. 7 nəfər igid oğlu Azərbaycanın Milli Qəhrəmanı adını alıb. Neçə-neçə igid Vətən oğlu torpaqlarımızın azadlığı uğrunda sağlamlığını itirərək qazi adını alıb. 

Birinci Qarabağ müharibəsində şirin canından keçərək adını tarixə yazdıran, Şəhidlik zirvəsinə ucalan igid oğullarımızdan biri də şəhid Allahyarov Sayad Fərrux oğludur.

Şəhid Sayad Allahyarov 1972-ci ildə Qazax şəhərində anadan olmuşdur. Qazax şəhər  Səlim Əfəndiyev adına 1 nömrəli tam orta məktəbdə orta təhsil almışdır. Polşa Respublikasında pilot kimi hərbi xidmətdə olmuşdur. 1992-ci ildə Qarabağ müharibəsinə yollanmışdır. 24 sentyabr 1992-ci ildə Əskipara istiqamətində gedən döyüşlərdə şəhid olmuşdur. Hüseynbəyli kənd qəbiristanlığında salınmış Şəhidlər xiyabanında dəfn edilmişdir. Subay idi.

Yanvarın 21-də şəhidimizin anası Allahyarova Dilbazi Abuzər qızı dünyasını dəyişib. Yanvarın 22-də dəfn edilən şəhid anasının bu gün üç mərasimi olub. 

Qazax Rayon İcra Hakimiyyətinin başçısı Rəcəb Babaşov icra aparatının məsul şəxsləri, "Qazax" Xeyriyyə İctimai Birliyi İdarə heyətinin sədri, professor İlham Pirməmmədov və Birliyin üzvü, şair Rəfael İncəyurdla birlikdə şəhidimizin ata ocağında olub. Rayon rəhbərliyi və qonaqlar şəhid anasının üç mərasimində iştirak edərək mərhumun ailəsinə başsağlığı veriblər.

İcra başçısı Rəcəb Babaşov və qonaqlar mərhum Dilbazi Allahyarovanın vəfatından kədərləndiyini bildirib, mərhumun qızına və yaxınlarına dərin hüznlə başsağlığı verib, Tanrıdan onlara səbir, dözüm diləyiblər. İllər ötsə belə şəhidlərimizə olan sonsuz ehtiramın, sevginin heç zaman dəyişməyəcəyi, əksinə daha da artacağı bildirilib. Nə qədər Azərbaycan xalqı var Sayad Allahyarov kimi qəhrəmanlarımızın daim qəlblərdə yaşayacaqları, şəhidlərimizlə yanaşı, onların ata və analarının da bizlər üçün doğma olduqları vurğulanıb.