"Psixi sağlamlığımızı qoruyaq" mövzusunda psixoloji maarifləndirmə tədbiri keçirilib
Oktyabrın 18-də Qazax şəhər Səməd Vurğun adına 2 nömrəli tam orta məktəbdə "Loqos" Psixoloji və Nitq Mərkəzinin təşkilatçılığı ilə 10 Oktyabr - Ümumdünya Psixi Sağlamlıq Gününə həsr olunmuş "Psixi sağlamlığımızı qoruyaq" mövzusunda psixoloji maarifləndirmə tədbiri keçirilib.
Tədbirdə Qazax Rayon İcra Hakimiyyəti başçısı aparatında Aparıcı məsləhətçi-Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Kəmalə Cəfərova, Qazax-Tovuz Regional Təhsil İdarəsinin Qazax rayonu üzrə Təhsil Sektorunda metodist Məhəmməd Cəfərov, "Loqos" Psixoloji və Nitq Mərkəzinin baş psixoloqu, Psixologiya üzrə fəlsəfə doktoru Elmira Mirzəyeva, Mərkəzin əməkdaşları, həmçinin, tələbələr, müəllimlər, həkimlər, valideynlər iştirak ediblər.
Tədbirdə əvvəlcə torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Qazax Rayon İcra Hakimiyyəti başçısı aparatında Aparıcı məsləhətçi-Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Kəmalə Cəfərova tədbiri giriş sözü ilə açaraq bildirib ki, bu kimi tədbirlərin rayon ərazisində keçirilməsi, rayon sakinləri arasında psixoloji maarifləndirmə işlərinin aparılması təqdirəlayiqdir. K.Cəfərova qeyd edib ki, bununla vətəndaşların bilik və bacarıqları daha da artmaqdadır. Bu cür tədbirlərin keçirilməsinə görə "Loqos" Psixoloji və Nitq Mərkəzinin rəhbər və kollektivinə minnətdarlığını bildirib, tədbir iştirakçılarına uğurlar arzulayıb.
"Loqos" Psixoloji və Nitq Mərkəzinin baş psixoloqu, Psixologiya üzrə fəlsəfə doktoru Elmira Mirzəyeva çıxış edərək tədbir iştirakçılarını salamlayıb, "Loqos" Psixoloji və Nitq Mərkəzinin çoxsahəli fəaliyyəti barədə geniş məlumat verib. E.Mirzəyeva bu gün cəmiyyət arasında ən çox yayılan stres və onların həll yolları, psixi sağlamlıq anlayışı, psixi sağlamlığın əlamətləri və göstəriciləri mövzularında öz bilik və bacarıqlarını tədbir iştirakçıları ilə bölüşüb.
"Loqos" Psixoloji və Nitq Mərkəzinin regional direktoru, psixoloq Günay Hüseynova çıxışında artıq 10 ildir ki, fəaliyyət göstərən "Loqos" Psixoloji və Nitq Mərkəzinin ölkəmizin ən böyük psixoloji mərkəzi olaraq paytaxt Bakıda və regionlarda 10 filialla fəaliyyətini davam etdirdiyini bildirib. Qazaxda fəaliyyət göstərən Mərkəzin də bütün psixoloji problemlərlə bağlı peşəkar fəaliyyətini layiqincə davam etdirdiyini bildirən G.Hüseynova bundan sonra da xalqımızın psixoloji sağlamlığının formalaşması istiqamətində uğurlu fəaliyyətini davam etdirəcəyini qeyd edib.
"Loqos" Psixoloji və Nitq Mərkəzinin baş uşaq psixoloqu Xəyal Bayramov çıxışı zamanı travma sonrası stres pozuntusu, onun əlamətləri, pozuntunun simptomları haqqında çıxış edərək tədbir iştirakçılarına öz tövsiyələrini verib.
"Loqos" Psixoloji və Nitq Mərkəzinin klinik psixoloqu Sona Davudova çıxışı zamanı müasir dövrdə psixi sağlamlıq mövzusunda öz fikirlərini tədbir iştirakçıları ilə bölüşərək günümüzdə baş verən dəyişikliklər fonunda cəmiyyətin psixi sağlamlıq dərəcəsi, əsas üzləşilən problemlər barədə fikirlərini söyləyib, öz tövsiyələrini verib.
Mərkəzin psixo-pedaqoqu Səlmi Əsgərova, loqopedi Aytac Nəbiyeva xüsusilə son dönəmlərdə geniş yayılan psixi və nitq inkişaf ləngiməsi, kəkələmə, dislaliya haqqında çıxış edərək bu problemlərin uşaqlar arasında get-gedə artdığını, zamanında tədbirlər görülməzsə, psixoloji problemin daha da özünü qabarıq şəkildə göstərəcəyini bildiriblər.
Mərkəzin inkluziv təhsil mütəxəssisi Aynurə Sarıyeva tədbir iştirakçıları üçün inkluziv təlim nədir, uşaqların inkluziv təhsilə yönlənməsinin əhəmiyyəti, inkluziv uşaqların sosial mühitə adaptasiyası mövzularında tədbir iştirakçıları üçün vacib məlumatlar verib.
Qazax-Tovuz Regional Təhsil İdarəsinin Qazax rayonu üzrə Təhsil Sektorunda metodist Məhəmməd Cəfərov tədbirin təşkilatçılarına razılığını ifadə edərək bu cür tədbirlərin keçirilməsinin mühüm əhəmiyyət daşıdığını bildirib.
Sonda tədbir iştirakçılarını maraqlandıran suallar cavablandırılıb. Xatirə şəkilləri çəkdirilib.
