Şura gənclərinin təcrübə proqramı çərçivəsində səfərləri davam etməkdədir
Artıq bir neçə gündür ki, Qazax Rayon İcra Hakimiyyəti yanında Gənclərin Yerli Məşvərət Şurasının üzvləri rayonda fəaliyyət göstərən dövlət müəssisələrinə səfər edərək onların iş prinsipləri ilə yaxından tanış olurlar.
Şura Gənclərinin təcrübə proqramı çərçivəsində səfərləri bu gün də davam edib. Dekabrın 19-da baş tutan ekskursiyada Qazax Rayon İcra Hakimiyyəti başçısı aparatının Hüquq şöbəsində məsləhətçi Aqil Alıcanov, Şuranın sədri Pəri İbrahimova və şura üzvləri iştirak ediblər.
Şura gəncləri təcrübə proqramı çərçivəsində Qazaxın bir sıra mədəni, idman və təhsil müəssisələrinə səfərlər edərək bilik və təcrübələrini artırmaq üçün dəyərli imkanlar əldə ediblər. Bu səfərlər gənclərin həm mədəni irsi daha yaxından tanımasına, həm də təşkilati biliklərini inkişaf etdirməsinə şərait yaradıb.
İlk olaraq gənclər Qazax Dövlət Rəsm Qalereyasına səfər ediblər. Onlar burada sərgilənən sənət əsərləri ilə tanış olaraq əsərlərin tarixi, müəllifləri və sənət üslubları haqqında ətraflı məlumat alıblar. Bu səfər gənclərin mədəni biliklərini zənginləşdirərək sənətə olan maraqlarını artırıb.
Daha sonra Qazax-Tovuz Regional Gənclər və İdman İdarəsinə səfər təşkil olunub. İdarənin rəisi Əziz Məsmalıyev gənclərə idarənin fəaliyyəti, həyata keçirilən layihələr və iş prinsipləri haqqında məlumat verib. Çay süfrəsi ətrafında keçirilən müzakirələrdə görüləcək işlər və gələcək əməkdaşlıq imkanları haqqında fikir mübadiləsi aparılıb.
Ardınca Qazax Olimpiya İdman Kompleksinə səfər zamanı gənclər kompleksdə mövcud olan idman qurğuları və burada yaradılmış şəraitlə tanış olublar. Onlara həm peşəkar idmançılar, həm də həvəskarlar üçün yaradılan imkanlar barədə məlumat verilib.
Son dayanacaq Bakı Dövlət Universitetinin Qazax filialı olub. Burada gənclər tədris otaqları, kitabxana və laboratoriyalarla tanış olublar. Filialda yaradılmış Şəhidlər guşəsi isə xüsusi diqqət çəkib. Gənclərə şəhidlərin Vətən uğrunda göstərdikləri qəhrəmanlıq haqqında məlumat verilib ki, bu da onların milli-mənəvi dəyərlərə olan bağlılığını gücləndirib.
